شخبطه على الحيط 1

مين قال ان الي بيحب بيسامح على طول , مين قال ان من حقك تجرح الي بيحبوك وتغيب عنهم وتعذبهم ولما ترجعلهم ومن اقل كلمه لازم يسامحوك !!  هو الحب انك تنجرح وتتعذب وتتألم وبعد كل دا في ثواني تسامح وتنسى ؟؟ وليه  لما هم هيرجعوا ويطلبوا منك  تنسى  كانوا بيجرحوك اصلا ؟
حتى الحب مش دوا كافي  للجرح والالم الي ممكن يسببهولك حد انت بتحبه ,,

الحب زي واحد عنده مناعه كويسه  ,, بس لازم بتعب ويجيله برد لما يطلع في الهوا يمكن التعب  في اول مره مش هيكون جامد وهيخف لما ياخد حبايه اسبرين ,, لكن مره في مره  وتعب بعد تعب الاسبرين مش هيعمل حاجه ولا كل االمضادات الحيويه هتخليك تخف ,,, جسمك هيعمل مناعه مضاده والدوا الي كان بيجيب نتيجه وتخف عليه بقى زي قلته مبقاش ليه لزوم 

لو ليك حد بتحبه حافظ عليه ,, متجرحوش وترجع تطلب منه يسامحك 
متبعدش عنه ولما تحنله ترجع تطلب منه يرجعلك ,,  قبل اي كلمه او تصرف  فكر الف مره هيبعدك عن الشخص الي بتحبه دا ولا لا ؟؟  يمكن هو كمان بيحبك ويمكن لسى في باله وبيحس بيك ,, واكيد لسى بتطلع في عنيه بسمه لما بيفتكر حاجه بينك وبينه , بس افتكر ان حتى  الوجع بيضحكنا اوقات ,, بيضحكنا لما بنفتكر ازاي استحملنا كل دا وازاي قولنا في يوم هنموت وصحينا ولقينا نفسنا لسى عايشين .. يمكن عايشين مجروحين او موجعين بس عايشين  ,,ويمكن نسينا وعدينا ولذكرى الجرح دا مش فاكرين ..

 في كل الحالات متستناش من حد  استسهل جرحك انه يحافظ عليك ازاي هيحميك من الناس وهو اصلا بيطعن فيك ؟؟ هو انت عمرك اصلا اتخليت عن حاجه كانت عزيزه عليك ؟؟